Monthly Archives: July 2007

عبر ثوبي الاسود


هناك ملابس حين ترتديها تجبرك علي اختيار خطوات معينة….في الثوب الاسود الضيق
كنتُ أعي تماما القيد الذي يلف ساقاي في مقابل كل الحرية الممنوحة لكامل جسدي رأيت ارتجاجاته الحرة في نظراتهم
بعض الثياب أيضاً حين ترتديها تضفي علي نظراتك لونا من القسوة ليست من اختيارك..في نظراتهم رأيت ما انا مقبلة عليه.. الثوب الذي يجبرك علي تلك الخطوات المتراقصة التي لا تصلح لمثل هذا الشارع المزدحم.. عبور هذا الطريق مرة بعد مرة بعد اخري وأخيرا بثوب مثل هذا ..حين يفتح الباب بتلك النظرات التي تتعري من كل سلاح..بعد خطوات قليلة و(مساء الخير)تقولينها باعتداد شديد..ربما تكون تلك المرة آخر ما تدفعينه ثمنا لحريتك

يا ساكني أسوان


هو أنا لو قلتلك انك وحشتيني الكام يوم اللي فاتوا أبقي بأبالغ؟
طيب لو قلت انك كنت واحشاني اوي آخر مرة كنتي قدامي فيها أبقي بابالغ أوي؟..من يوم
مارجعت من أسوان بأتعمد اني ماعديش علي بيتك رغم انه علي اول شارعنا..امبارح
كانت اول مرة أمر عليه وانتِ مش هنا..اول مرة أعدي ومالاقيش شراباتك منشورة علي الحبل
الشرابات الملونة اللي عليها قطط وكلاب اللي فضلنا أنا وانتِ نلبسها لحد ما خلصنا جامعة.. عارفة اني لو
دخلت بيتك (أقصد البيت اللي علي أول شارعنا)مش هلاقي حاجات كتير،أكيد مش هلاقي كتبك لانهم سافروا وراكي
اسوان..خمس كراتين كتب يا مفترية الراجل شالهم علي قلبه لحد بيتك الجديد في الدور الخامس
واكيد هلاقي اوضتك منظمة علي غير العادة ،وكل حاجة مكانها..مش هلاقي مجلة وجهات نظر علي المكتب وأكيد مش هلاقي شرايط
فيروز وماجدة الرومي(لانك نسيتيهم عندي آخر مرة كنتِ بايتة فيها عندنا)ء
في واحد كان بيقول ان (دايماً فيه اول مرة)…….تعالي كدة نحاول نحسب أنا وانتِ بيننا كام أول مرة
…..
……
……..
أول مرة سمعت ماجدة الرومي كانت معاكي
اول مرة أشرب كابوتشينو انتِ اللي علمتيني اعمله ازاي برغوة عالية
واول مرة ادخل الاكسلسيور كانت معاكي..في الترابيزة البعيدة اللي في الركن لما قعدتي تشرحيلي الفرق بين أنواع البيرة!!!واول مرة
أدخل سينما مع حد غير أمي كان معاكي
في كل صدماتي العاتشيفية كنتي بتاخدينا علي بيكري وتعزميني علي
وتصممي انك تحتفظي بالفاتورة ..دلوقتي أخاف أحب علشان عارفة اني لو اتصدمت مش هتكوني هناhot choclate
لما قلتلك ان عمر ما حد جابلي ورد كنت اول حد يجيبلي ورد القرنفل الامريكي فاكراه..
كنت اول حد يحتفل بعيد ميلادي كدة
اول مرة آكل جلاكسي فلوتس كانت معاكي
اول كتاب اقراه لهيكل كان بتاعك واول مرة اعرف ان في مجلة اسمها وجهات نظر كانت معاكي
اول مرة نكتشف نجوم اف ام كانت الساعة تلاتة الصبح واحنا سهرانين بنذاكر وكان يومها اول مرة تباتي فيها معايا
اول وآخر مرة اكتب لحد عصيدة اعتذار كنتِ انتِ
اول مرة اشوف كتالوجات ايفون واوريفليم كانت معاكي واول مرة اقرأ فقه المرأة كانت برضه معاكي
بيني وبينك كام اول مرة وكام تفصيلة محفورة في السنين اللي بين رابعة ابتدائي ورابعة جامعة..كل الهزار والخناق والضحك والطاقة والوجع..كل الآيس كريم اللي اكلناه عند خليفة وكل المشي مابين شارع تسعة وميدان الاتحاد
كل المذاكرة واللعب مابين الخبيري الابتدائية والاسراء الاعدادية والمعادي الثانوية وآداب القاهرة..التزويغ الساعة ستة الصبح من المدرسة علشان تقف علي كورنيش المعادي نبص علي شمس الشتا
فريق الاوهام بتاع كرة السلة ..حصص الالعاب..الفسحة..موقف الميكروباصات
………..
……………
……………….
كل حاجة فيكي هتوحشني حتي سرحانك وتوهانك وعيونك المزوغة علي طول..حتي عصبيتك وتناحتك والطريقة اللي بتنطقي بيها اسم مصطفي
يمكن ماعرفتش انك هتوحشيني كدة غير لحظة ما شفتك لابسة فستان الفرح كل تفاصيلنا
مرت قدام عيوني ولقيت نفسي بابوس ايديكِ قدام كل الناس..هتوحشيني وهتوحشني اسوان
%d bloggers like this: