يا ساكني أسوان


هو أنا لو قلتلك انك وحشتيني الكام يوم اللي فاتوا أبقي بأبالغ؟
طيب لو قلت انك كنت واحشاني اوي آخر مرة كنتي قدامي فيها أبقي بابالغ أوي؟..من يوم
مارجعت من أسوان بأتعمد اني ماعديش علي بيتك رغم انه علي اول شارعنا..امبارح
كانت اول مرة أمر عليه وانتِ مش هنا..اول مرة أعدي ومالاقيش شراباتك منشورة علي الحبل
الشرابات الملونة اللي عليها قطط وكلاب اللي فضلنا أنا وانتِ نلبسها لحد ما خلصنا جامعة.. عارفة اني لو
دخلت بيتك (أقصد البيت اللي علي أول شارعنا)مش هلاقي حاجات كتير،أكيد مش هلاقي كتبك لانهم سافروا وراكي
اسوان..خمس كراتين كتب يا مفترية الراجل شالهم علي قلبه لحد بيتك الجديد في الدور الخامس
واكيد هلاقي اوضتك منظمة علي غير العادة ،وكل حاجة مكانها..مش هلاقي مجلة وجهات نظر علي المكتب وأكيد مش هلاقي شرايط
فيروز وماجدة الرومي(لانك نسيتيهم عندي آخر مرة كنتِ بايتة فيها عندنا)ء
في واحد كان بيقول ان (دايماً فيه اول مرة)…….تعالي كدة نحاول نحسب أنا وانتِ بيننا كام أول مرة
…..
……
……..
أول مرة سمعت ماجدة الرومي كانت معاكي
اول مرة أشرب كابوتشينو انتِ اللي علمتيني اعمله ازاي برغوة عالية
واول مرة ادخل الاكسلسيور كانت معاكي..في الترابيزة البعيدة اللي في الركن لما قعدتي تشرحيلي الفرق بين أنواع البيرة!!!واول مرة
أدخل سينما مع حد غير أمي كان معاكي
في كل صدماتي العاتشيفية كنتي بتاخدينا علي بيكري وتعزميني علي
وتصممي انك تحتفظي بالفاتورة ..دلوقتي أخاف أحب علشان عارفة اني لو اتصدمت مش هتكوني هناhot choclate
لما قلتلك ان عمر ما حد جابلي ورد كنت اول حد يجيبلي ورد القرنفل الامريكي فاكراه..
كنت اول حد يحتفل بعيد ميلادي كدة
اول مرة آكل جلاكسي فلوتس كانت معاكي
اول كتاب اقراه لهيكل كان بتاعك واول مرة اعرف ان في مجلة اسمها وجهات نظر كانت معاكي
اول مرة نكتشف نجوم اف ام كانت الساعة تلاتة الصبح واحنا سهرانين بنذاكر وكان يومها اول مرة تباتي فيها معايا
اول وآخر مرة اكتب لحد عصيدة اعتذار كنتِ انتِ
اول مرة اشوف كتالوجات ايفون واوريفليم كانت معاكي واول مرة اقرأ فقه المرأة كانت برضه معاكي
بيني وبينك كام اول مرة وكام تفصيلة محفورة في السنين اللي بين رابعة ابتدائي ورابعة جامعة..كل الهزار والخناق والضحك والطاقة والوجع..كل الآيس كريم اللي اكلناه عند خليفة وكل المشي مابين شارع تسعة وميدان الاتحاد
كل المذاكرة واللعب مابين الخبيري الابتدائية والاسراء الاعدادية والمعادي الثانوية وآداب القاهرة..التزويغ الساعة ستة الصبح من المدرسة علشان تقف علي كورنيش المعادي نبص علي شمس الشتا
فريق الاوهام بتاع كرة السلة ..حصص الالعاب..الفسحة..موقف الميكروباصات
………..
……………
……………….
كل حاجة فيكي هتوحشني حتي سرحانك وتوهانك وعيونك المزوغة علي طول..حتي عصبيتك وتناحتك والطريقة اللي بتنطقي بيها اسم مصطفي
يمكن ماعرفتش انك هتوحشيني كدة غير لحظة ما شفتك لابسة فستان الفرح كل تفاصيلنا
مرت قدام عيوني ولقيت نفسي بابوس ايديكِ قدام كل الناس..هتوحشيني وهتوحشني اسوان

About alexandmellia

سأكون يوما ما أريد..وما أكون

Posted on July 14, 2007, in ألوان and tagged . Bookmark the permalink. 5 Comments.

  1. أولا انتي مختفية ليه يا استاذة ؟
    ثم البوست موجع جدا وجع من طراز وجع الجمال
    تحياتي

  2. نهى جمـال

    بوست أوجعني أوي

    الصداقة بتبقى أحيانا رابط أقوى مما نتخيل

    يمكن حسيته لأني بعتبر صاحبتي من ايام الكلية أقرب شخص لقلبي ومش متخيلة يوم نسكن في مناطق بعيدة عن بعض

    ومش متخيلة إني ممكن ما اتصلش بيها واقلها نخرج النهاردة نشوف بعض

    ومنعرفش

    شكرا لكِ

    وربنا يسعدها وتتلاقوا زي أيام اللي فاتت

  3. enty 3’areeba awy we 7asasa ledraget an 7ases eny 3eshet ma3aky elmaw2efek

    bas lazem te7esy belly 7awaleky

  4. انا قريت الكلام دا 14 مرة لحد دلوقت … كل مرة ادخل فيها اقراه يمكن تلات مرات…و مش عارف, هي أول مرة علشان كدا انت فكراها و لا علشانت انت فكراها بقت أول مرة, و خلي بالك ان و جود أول مرة, من منطلق ان دايما في أول مرة , مش ملزم لوجود تاني مرة, بس ع العموم كلها حاجات و لحظات و روايح تستاهل انها تتسجل بكل التفاصيل دي, بالظبط ما أول مرة فراق دعت انك تسجليها

  5. هي التفاصيل دي أسوأ شيء
    ممكن بعد عشر سنين يكون ماشي مع مراته وبنته وفنجان اسبريسو يخليه يبكي
    🙂
    بحييك على أسلوبك الجميل في الحكي
    مدونتك أسعدتني🙂

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: